సక్సెస్ వేరు, సంతృప్తి వేరు.. కెనడా డ్రీమ్ లైఫ్ వదిలి భారత్‌కు వస్తున్న యువతి

విదేశాల్లో అద్భుతమైన జీవితం, మంచి ఉద్యోగం.. చాలా మంది యువత కల ఇది. కానీ కెనడాలో అలాంటి ‘డ్రీమ్ లైఫ్’ నిర్మించుకున్న ఓ భారతీయ యువతి, విజయం మాత్రమే సంపూర్ణ సంతృప్తిని ఇవ్వదంటూ మాతృభూమికి తిరిగి రావాలని నిర్ణయించుకుంది. గోవాకు చెందిన 23 ఏళ్ల షరోన్ పండోరి కథ, నేటితరం యువత ఆలోచనలకు అద్దం పడుతోంది.

2021లో ఉన్నత చదువుల కోసం కెనడా వెళ్లిన షరోన్, వెస్టర్న్ యూనివర్సిటీలో మీడియా, ఇన్ఫర్మేషన్ అండ్ టెక్నోకల్చర్ విభాగంలో డీన్స్ హానర్‌తో పట్టా అందుకుంది. చదువుకునే రోజుల్లోనే యూనివర్సిటీలో సోషల్ మీడియా, మార్కెటింగ్ రోల్స్‌లో పనిచేసి తనకంటూ ఒక గుర్తింపు తెచ్చుకుంది. కెనడాలో స్వాతంత్ర్యం, మంచి కెరీర్, స్వీయ సమృద్ధి సాధించినప్పటికీ, ఏదో వెలితి ఆమెను వెంటాడింది.

భారత్‌ను సందర్శించిన ప్రతీసారి ఇక్కడి వాతావరణం, ముఖ్యంగా స్టార్టప్‌లు, సృజనాత్మక రంగాల్లో పెరుగుతున్న అవకాశాలు ఆమెను ఆకర్షించాయి. కెనడాలో వృత్తిపరంగా విజయం సాధించినా, కుటుంబ సంబంధాలు, పండుగలు, సామాజిక అనుబంధాలు లేని జీవితం అసంపూర్ణంగా అనిపించింది. దీంతో సొంతగడ్డపై అర్థవంతమైన జీవితాన్ని నిర్మించుకోవాలని నిర్ణయించుకుంది.

భారత్‌కు తిరిగివచ్చి గోవాలో ‘వివాసియో’ అనే రిసార్ట్ వేర్ లేబుల్‌ను ప్రారంభించాలని, సామాజిక కార్యక్రమాల ద్వారా ఒంటరితనాన్ని తగ్గించే ప్రయత్నం చేయాలని షరోన్ భావిస్తోంది. "విదేశాల్లో స్థిరపడటమే ఏకైక విజయం కాదు. తిరిగి రావడం వైఫల్యం అంతకన్నా కాదు. ఇది నా వ్యక్తిగత, స్పృహతో తీసుకున్న నిర్ణయం. కెనడా నాకు ఎన్నో అనుభవాలు, పాఠాలు నేర్పించింది. ఇప్పుడు వాటిని నావెంట తీసుకువచ్చి, సొంతగడ్డపై నేను ఏమి నిర్మించగలనో చూడాలనుకుంటున్నాను" అని షరోన్ వివరించారు. ఆమె నిర్ణయం, సక్సెస్ కంటే సంతృప్తికే ఎక్కువ విలువిస్తున్న నేటి యువతరం ఆలోచనా ధోరణికి నిదర్శనంగా నిలుస్తోంది.